Песнь 1

Ирмос: Яко по су́ху пешешéствовав Изра́иль, по бéздне стопа́ми, гони́теля фарао́на ви́дя потопля́ема, Бо́гу побéдную песнь пои́м, вопи́яше.

Припев: Помилуй мя, Боже, помилуй мя.

Ны́не приступи́х аз грéшный и обременéнный к Тебé, Влады́це и Бо́гу моему́; не смею́ же взира́ти на нéбо, то́кмо молю́ся, глаго́ля: даждь ми, Го́споди, ум, да пла́чуся дел мои́х го́рько.

Помилуй мя, Боже, помилуй мя.

О го́ре мне грéшному! Па́че всех человéк окая́нен есмь, покая́ния несть во мне; даждь ми, Го́споди, слéзы, да пла́чуся дел мои́х го́рько.

Помилуй мя, Боже, помилуй мя.

Безу́мне, окая́нне человéче, в лéности врéмя губи́ши; помы́сли житиé твоé, и обрати́ся ко Го́споду Бо́гу, и пла́чися о дéлех твои́х го́рько.

Пресвятая Богородице, спаси нас.

Богородичен: Ма́ти Бо́жия Пречи́стая, воззри́ на мя грéшнаго, и от сéти диа́воли изба́ви мя, и на путь покая́ния наста́ви мя, да пла́чуся дел мои́х го́рько.

Пресвятая Богородице, спаси нас.

Мно́гими содержи́мь напа́стьми, к Тебé прибегаю́, спасéния иски́й: о Ма́ти Сло́ва и Дéво, от тя́жких и лю́тых мя спаси́.

Пресвятая Богородице, спаси нас.

Страстéй мя смуща́ют прило́зи, мно́гаго уны́ния испо́лнити мою́ ду́шу: умири́, Отрокови́це, тишино́ю Сы́на и Бо́га Твоего́, Всенепоро́чная.

Пресвятая Богородице, спаси нас.

Спа́са ро́ждшую Тя и Бо́га, молю́, Дéво, изба́витися ми лю́тых: к Тебé бо ны́не прибега́я, простира́ю и ду́шу и помышлéние.

Пресвятая Богородице, спаси нас.

Неду́гующа тéлом и душéю, посещéния Божéственнаго и промышлéния от Тебé сподо́би, еди́на Богома́ти, я́ко Блага́я, Блага́го же Роди́тельница.

Иисусу: Господи Иисусе Христе Боже мой, помилуй мя.

Песнь воспéти и восхвали́ти, Спа́се, Твоего́ раба́ досто́йно сподо́би, безпло́тному Ангелу, наста́внику и храни́телю моему́.

Святый Ангеле Божий, хранителю мой, моли Бога о мне.

Еди́н аз в неразу́мии и в лéности ны́не лежу́, наста́вниче мой и храни́телю, не оста́ви менé погиба́юща.

Слава: Ум мой твоéю моли́твою напра́ви, твори́ти ми Бо́жия повелéния, да получу́ от Бо́га отда́ние грехо́в, и ненави́дети ми злых наста́ви мя, молю́ся ти.

И ныне: Моли́ся, Деви́це, о мне, рабé Твоéм, ко Благода́телю, со храни́телем мои́м Ангелом, и наста́ви мя твори́ти за́поведи Сы́на Твоего́ и Творца́ моего́.

Песнь 3

Ирмос: На ка́мени мя вéры утверди́в, разшири́л еси́ уста́ моя на враги́ моя́: возвесели́ бо ся дух мой, внегда́ пéти: несть свят я́коже Бог наш, и несть пра́веден па́че Тебé Го́споди.

Помилуй мя, Боже, помилуй мя.

Внегда́ поста́влени будут престо́ли на Суди́щи Стра́шнем, тогда́ всех человéк дела́ облича́тся; го́ре та́мо бу́дет грéшным, в му́ку отсыла́емым; и то вéдущи, душé моя́, пока́йся от злых дел твои́х.

Помилуй мя, Боже, помилуй мя.

Пра́ведницы возра́дуются, а грéшнии воспла́чутся, тогда́ никто́же возмо́жет помощи́ нам, но дела́ на́ша осу́дят нас; тéмже прéжде конца́ пока́йся от злых дел твои́х.

Помилуй мя, Боже, помилуй мя.

Увы́ мне великогрéшному, и́же дéлы и мы́сльми оскверни́вся, ни ка́пли слез имею́ от жестосéрдия; ны́не возни́кни от земли́, душé моя́, и пока́йся от злых дел твои́х.

Пресвятая Богородице, спаси нас.

Богородичен: Се, взыва́ет, Госпожé, Сын Твой, и поуча́ет нас на до́брое, аз же грéшный добра́ всегда́ бéгаю; но Ты, Ми́лостивая, поми́луй мя, да пока́юся от злых мои́х дел.

Пресвятая Богородице, спаси нас.

Предста́тельство и покро́в жи́зни моея́ полагаю́ Тя, Богороди́тельнице Дéво: Ты мя окорми́ ко приста́нищу Твоему́, благи́х вино́вна, вéрных утверждéние, еди́на Всепéтая.

Пресвятая Богородице, спаси нас.

Молю́, Дéво, душéвное смущéние и печа́ли моея́ бу́рю разори́ти: Ты бо, Богоневéстная, нача́льника тишины́ Христа́ родила́ еси́, еди́на Пречи́стая.

Пресвятая Богородице, спаси нас.

Благодéтеля ро́ждши до́брых вино́внаго, благодея́ния бога́тство всем источи́, вся бо мо́жеши, я́ко си́льнаго в крéпости Христа́ ро́ждши, Богоблажéнная.

Пресвятая Богородице, спаси нас.

Лю́тыми неду́ги и болéзненными страстьми́ истяза́ему, Дéво, Ты ми помози́: исцелéний бо неоску́дное Тя знаю́ сокро́вище, Пренепоро́чная, неиждива́емое.

Святый Ангеле Божий, хранителю мой, моли Бога о мне.

Все помышлéние моé и ду́шу мою́ к тебé возложи́х, храни́телю мой; ты от вся́кия мя напа́сти вра́жия изба́ви.

Святый Ангеле Божий, хранителю мой, моли Бога о мне.

Враг попираéт мя, и озлобля́ет, и поуча́ет всегда́ твори́ти своя́ хотéния; но ты, наста́вниче мой, не оста́ви менé погиба́юща.

Слава: Пéти песнь со благодарéнием и усéрдием Творцу́ и Бо́гу даждь ми, и тебé, благо́му Ангелу храни́телю моему́: изба́вителю мой, изми́ мя от враг озлобля́ющих мя.

И ныне: Исцели́, Пречи́стая, моя́ многонеду́жныя стру́пы, я́же в души́, прожени́ враги́, и́же при́сно бо́рются со мно́ю.

Господи, помилуй. (Трижды)

Седален Иисусу, глас 6

Помышля́ю день стра́шный и пла́чуся дея́ний мои́х лука́вых: ка́ко отвеща́ю Безсмéртному Царю́, или́ ко́им дерзновéнием воззрю́ на Судию́, блу́дный аз? Благоутро́бный Отче, Сы́не Единоро́дный и Ду́ше Святы́й, поми́луй мя.

Седален Ангелу, глас 2

Слава: От любвé душéвныя вопию́ ти, храни́телю моея́ души́, всесвяты́й мой Ангеле: покры́й мя и соблюди́ от лука́ваго ловлéния всегда́, и к жи́зни наста́ви небéсней, вразумля́я и просвеща́я и укрепля́я мя.

Богородичен

И ныне: Богоро́дице безневéстная Пречи́стая, Яже без сéмене ро́ждши всех Влады́ку, Того́ со Ангелом храни́телем мои́м моли́, изба́вити ми ся вся́каго недоумéния, и да́ти умилéние и свет души́ моéй и согрешéнием очищéние, Яже еди́на вско́ре заступа́ющи.

Песнь 4

Ирмос: Пришéл еси от Дéвы, не хода́тай, ни Ангел, но Сам Го́споди вопло́щься, и спасл еси всего́ мя человéка; тем зову́ Ти: сла́ва си́ле Твоéй, Го́споди.

Помилуй мя, Боже, помилуй мя.

Широ́к путь зде и уго́дный сла́сти твори́ти, но го́рько бу́дет в послéдний день, егда́ душа́ от тéла разлуча́тися бу́дет: блюди́ся от сих, человéче, Ца́рствия ра́ди Бо́жия.

Помилуй мя, Боже, помилуй мя.

Почто́ убо́гаго оби́диши, мзду наéмничу удéржуеши, бра́та твоего́ не лю́биши, блуд и го́рдость го́ниши? Оста́ви у́бо сия́, душé моя́, и пока́йся Ца́рствия ра́ди Бо́жия.

Помилуй мя, Боже, помилуй мя.

О безу́мный человéче, доко́ле углеба́еши, я́ко пчела́, собира́ющи бога́тство твоé? Вско́ре бо поги́бнет, я́ко прах и пéпел: но бо́лее взыщи́ Ца́рствия Бо́жия.

Пресвятая Богородице, спаси нас.

Богородичен: Госпожé Богоро́дице, поми́луй мя, грéшнаго, и в добродéтели укрепи́, и соблюди́ мя, да на́глая смерть не похи́тит мя негото́ваго; и доведи́ мя, Дéво, Ца́рствия Бо́жия.

Пресвятая Богородице, спаси нас.

Страстéй мои́х смущéние, ко́рмчию ро́ждшая Го́спода, и бу́рю ути́ши мои́х прегрешéний, Богоневéстная.

Пресвятая Богородице, спаси нас.

Милосéрдия Твоего́ бéздну призыва́ющу пода́ждь ми, Яже Благосéрдаго ро́ждшая и Спа́са всех пою́щих Тя.

Пресвятая Богородице, спаси нас.

Наслажда́ющеся, Пречи́стая, Твои́х дарова́ний, благода́рственное воспева́ем пéние, вéдуще Тя Богома́терь.

Пресвятая Богородице, спаси нас.

На одрé болéзни моея́ и нéмощи низлежа́щу ми, яко Боголюби́ва, помози́, Богоро́дице, еди́на Приснодéво.

Пресвятая Богородице, спаси нас.

Надéжду и утверждéние и спасéния стéну недви́жиму иму́ще Тя, Всепéтая, неудо́бства вся́каго избавля́емся.

Святый Ангеле Божий, хранителю мой, моли Бога о мне.

Моли́ Человеколю́бца Бо́га ты, храни́телю мой, и не оста́ви менé, но при́сно в ми́ре житиé моé соблюди́ и пода́ждь ми спасéние необори́мое.

Святый Ангеле Божий, хранителю мой, моли Бога о мне.

Яко засту́пника и храни́теля животу́ моему́ приéм тя от Бо́га, Ангеле, молю́ тя, святы́й, от вся́ких мя бед свободи́.

Слава: Мою́ сквéрность твоею́ святы́нею очи́сти, храни́телю мой, и от ча́сти шу́ия да отлучéн бу́ду моли́твами твои́ми и прича́стник сла́вы явлю́ся.

И ныне: Недоумéние предлежи́т ми от обышéдших мя зол, Пречи́стая, но изба́ви мя от них ско́ро: к Тебé бо еди́ней прибего́х.

Песнь 5

Ирмос: Бо́жиим свéтом Твои́м, Бла́же, у́тренюющих Ти ду́ши любо́вию озари́, молю́ся, Тя вéдети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Помилуй мя, Боже, помилуй мя.

Воспомяни́, окая́нный человéче, ка́ко лжам, клевета́м, разбо́ю, нéмощем, лю́тым зверéм, грехо́в ра́ди порабощéн еси́; душé моя́ грéшная, того́ ли восхотéла еси́?

Помилуй мя, Боже, помилуй мя.

Трепéщут ми у́ди, всéми бо сотвори́х вину́: очи́ма взира́яй, уши́ма слы́шай, язы́ком зла́я глаго́ляй, всего́ себé геéнне предая́й; душé моя́ грéшная, сего́ ли восхотéла еси́?

Помилуй мя, Боже, помилуй мя.

Блудника́ и разбо́йника ка́ющася прия́л еси́, Спа́се, аз же еди́н лéностию грехо́вною отягчи́хся и злым дело́м порабо́тихся; душé моя́ грéшная, сего́ ли восхотéла еси́?

Пресвятая Богородице, спаси нас.

Богородичен: Ди́вная и ско́рая помо́щнице всем человéком, Ма́ти Бо́жия, помози́ мне, недосто́йному, душа́ бо моя́ грéшная того́ восхотé.

Пресвятая Богородице, спаси нас.

Испо́лни, Чи́стая, весéлия сéрдце моé, Твою́ нетлéнную даю́щи ра́дость, весéлия ро́ждшая вино́внаго.

Пресвятая Богородице, спаси нас.

Изба́ви нас от бед, Богоро́дице Чи́стая, вéчное ро́ждши избавлéние, и мир, всяк ум преиму́щий.

Пресвятая Богородице, спаси нас.

Разреши́ мглу прегрешéний мои́х, Богоневéсто, просвещéнием Твоея́ свéтлости, Свет ро́ждшая Божéственный и превéчный.

Пресвятая Богородице, спаси нас.

Исцели́, Чи́стая, души́ моея́ неможéние, посещéния Твоего́ сподо́бльшая, и здра́вие моли́твами Твои́ми пода́ждь ми.

Святый Ангеле Божий, хранителю мой, моли Бога о мне.

Яко имéя дерзновéние к Бо́гу, храни́телю мой святы́й, Сего́ умоли́ от оскорбля́ющих мя зол изба́вити.

Святый Ангеле Божий, хранителю мой, моли Бога о мне.

Свéте свéтлый, свéтло просвети́ ду́шу мою́, наста́вниче мой и храни́телю, от Бо́га да́нный ми Ангеле.

Слава: Спя́ща мя зле тягото́ю грехо́вною, я́ко бдя́ща сохрани́, Ангеле Бо́жий, и возста́ви мя на славосло́вие молéнием твои́м.

И ныне: Мари́е, Госпожé Богоро́дице безневéстная, надéждо вéрных, вра́жия возношéния низложи́, пою́щия же Тя возвесели́.

Песнь 6

Ирмос: Житéйское мо́ре, воздвиза́емое зря напа́стей бу́рею, к ти́хому приста́нищу Твоему́ притéк, вопию́ Ти: возведи́ от тли живо́т мой, Многоми́лостиве.

Помилуй мя, Боже, помилуй мя.

Житиé на земли́ блу́дно пожи́х и ду́шу во тьму преда́х, ны́не у́бо молю́ Тя, Ми́лостивый Влады́ко: свободи́ мя от рабо́ты сея́ вра́жия, и даждь ми ра́зум твори́ти во́лю Твою́.

Помилуй мя, Боже, помилуй мя.

Кто твори́т таковая́, я́ко же аз? Якоже бо свиния́ лежи́т в калу́, та́ко и аз греху́ служу́. Но Ты, Го́споди, исто́ргни мя от гну́са сего́ и даждь ми сéрдце твори́ти за́поведи Твоя́.

Помилуй мя, Боже, помилуй мя.

Воспряни́, окая́нный человéче, к Бо́гу, воспомяну́в своя́ согрешéния, припа́дая ко Творцу́, слезя́ и стеня́; Той же, я́ко милосéрд, даст ти ум зна́ти во́лю Свою́.

Пресвятая Богородице, спаси нас.

Богородичен: Богоро́дице Дéво, от ви́димаго и неви́димаго зла сохрани́ мя, Пречи́стая, и приими́ моли́твы моя́, и донеси́ я Сы́ну Твоему́, да даст ми ум твори́ти во́лю Его́.

Пресвятая Богородице, спаси нас.

Смéрти и тли я́ко спасл есть, Сам Ся изда́в смéрти, тлéнием и смéртию моé естество́ я́то бы́вшее, Дéво, моли́ Го́спода и Сы́на Твоего́, враго́в злодéйствия мя изба́вити.

Пресвятая Богородице, спаси нас.

Предста́тельницу Тя живота́ вем и храни́тельницу твéрду, Дéво, и напа́стей реша́щу молвы́, и нало́ги бесо́в отгоня́ющу; и молю́ся всегда́, от тли страстéй мои́х изба́вити мя.

Пресвятая Богородице, спаси нас.

Яко стéну прибéжища стяжа́хом, и душ всесовершéнное спасéние, и простра́нство в ско́рбех, Отрокови́це, и просвещéнием Твои́м при́сно ра́дуемся: о Влады́чице, и ны́не нас от страстéй и бед спаси́.

Пресвятая Богородице, спаси нас.

На одрé ны́не немощству́яй лежу́, и несть исцелéния пло́ти моéй: но, Бо́га и Спа́са ми́ру и Изба́вителя неду́гов ро́ждшая, Тебé молю́ся, Благо́й: от тли неду́г возста́ви мя.

Святый Ангеле Божий, хранителю мой, моли Бога о мне.

Вся́ких мя напа́стей свободи́, и от печа́лей спаси́, молю́ся ти, святы́й Ангеле, да́нный ми от Бо́га, храни́телю мой до́брый.

Святый Ангеле Божий, хранителю мой, моли Бога о мне.

Освети́ ум мой, бла́же, и просвети́ мя, молю́ся ти, святы́й Ангеле, и мы́слити ми полéзная всегда́ наста́ви мя.

Слава: Уста́ви сéрдце моé от настоя́щаго мятéжа и бдéти укрепи́ мя во благи́х, храни́телю мой, и наста́ви мя чу́дно к тишинé живо́тней.

И ныне: Сло́во Бо́жие в Тя всели́ся, Богоро́дице, и человéком Тя показа́ небéсную лéствицу; Тобою́ бо к нам Вы́шний сошéл есть.

Го́споди, поми́луй. (Трижды)

Слава, и ныне:

Кондак

Душé моя́, почто́ греха́ми богатéеши, почто́ во́лю диа́волю твори́ши, в чесо́м надéжду полага́еши? Преста́ни от сих и обрати́ся к Бо́гу с пла́чем, зову́щи: милосéрде Го́споди, поми́луй мя грéшнаго.

Икос

Помы́сли, душé моя́, го́рький час смéрти и Стра́шный Суд Творца́ твоего́ и Бо́га: Ангели бо гро́знии по́ймут тя, душé, и в вéчный огнь введу́т: у́бо прéжде смéрти пока́йся, вопию́щи: Го́споди, поми́луй мя грéшнаго.

Песнь 7

Ирмос: Росода́тельну у́бо пещь содéла Ангел преподо́бным отроко́м, халдéи же опаля́ющее велéние Бо́жие, мучи́теля увеща́ вопи́ти: благословéн еси, Бо́же отец на́ших.

Помилуй мя, Боже, помилуй мя.

Не надéйся, душé моя́, на тлéнное бога́тство и на непра́ведное собра́ние, вся бо сия́ не вéси кому́ оста́виши, но возопи́й: поми́луй мя, Христé Бо́же, недосто́йнаго.

Помилуй мя, Боже, помилуй мя.

Не упова́й, душé моя, на телéсное здра́вие и на скоромимоходя́щую красоту́, ви́диши бо, я́ко си́льнии и млади́и умира́ют, но возопи́й: поми́луй мя, Христé Бо́же, недосто́йнаго.

Помилуй мя, Боже, помилуй мя.

Воспомяни́, душé моя, вéчное житиé, Ца́рство Небéсное, угото́ванное святы́м, и тьму кромéшную и гнев Бо́жий злым, и возопи́й: поми́луй мя, Христé Бо́же, недосто́йнаго.

Пресвятая Богородице, спаси нас.

Богородичен: Припади́, душé моя, к Бо́жией Ма́тери и помоли́ся Той, есть бо ско́рая помо́щница каю́щимся, умо́лит Сы́на Христа́ Бо́га, и поми́лует мя недосто́йнаго.

Пресвятая Богородице, спаси нас.

На́ше спасéние я́коже восхотéл еси́, Спа́се, устро́ити, во утро́бу Дéвыя всели́лся еси, Юже ми́ру предста́тельницу показа́л еси́: отéц на́ших Бо́же, благословéн еси.

Пресвятая Богородице, спаси нас.

Воли́теля ми́лости, Его́же родила́ еси́, Ма́ти чи́стая, умоли́ изба́витися от прегрешéний и душéвных скверн вéрою зову́щим: отéц на́ших Бо́же, благословéн еси́.

Пресвятая Богородице, спаси нас.

Сокро́вище спасéния и Исто́чник нетлéния, Тя ро́ждшую, и столп утверждéния, и дверь покая́ния, зову́щим показа́л еси́: отéц на́ших Бо́же, благословéн еси́.

Пресвятая Богородице, спаси нас.

Телéсныя сла́бости и душéвныя неду́ги, Богороди́тельнице, любо́вию приступа́ющих к кро́ву Твоему́, Дéво, исцели́ти сподо́би, Спа́са Христа́ нам ро́ждшая.

Святый Ангеле Божий, хранителю мой, моли Бога о мне.

Ми́лостив бу́ди ми и умоли́ Бо́га, Госпо́день Ангеле, имею́ бо тя засту́пника во всем животé моéм, наста́вника же и храни́теля, от Бо́га дарова́ннаго ми во вéки.

Святый Ангеле Божий, хранителю мой, моли Бога о мне.

Не оста́ви в путь шéствующия души́ моея́ окая́нныя уби́ти разбо́йником, святы́й Ангеле, я́же ти от Бо́га предана́ бысть непоро́чне; но наста́ви ю́ на путь покая́ния.

Слава: Всю посра́млену ду́шу мою́ привожду́ от лука́вых ми по́мысл и дел: но предвари́, наста́вниче мой, и исцелéние ми пода́ждь благи́ми по́мыслы, уклоня́ти ми ся всегда́ на пра́выя стези́.

И ныне: Прему́дрости испо́лни всех и крéпости Божéственныя, Ипоста́сная Прему́дросте Вы́шняго, Богоро́дицы ра́ди, вéрою вопию́щих: отéц на́ших Бо́же, благословéн еси́.

Песнь 8

Ирмос: Из пла́мене преподо́бным ро́су источи́л еси́ и пра́веднаго жéртву водо́ю попали́л еси́: вся бо твори́ши, Христé, то́кмо éже хотéти. Тя превозно́сим во вся вéки.

Помилуй мя, Боже, помилуй мя.

Ка́ко не и́мам пла́катися, егда́ помышляю́ смерть, ви́дех бо во гро́бе лежа́ща бра́та моего́, безсла́вна и безобра́зна? Что у́бо ча́ю, и на что надéюся? То́кмо даждь ми, Го́споди, прéжде конца́ покая́ние. (Дважды)

Помилуй мя, Боже, помилуй мя.

Вéрую, я́ко прии́деши суди́ти живы́х и мéртвых, и вси во своéм чи́ну ста́нут, ста́рии и млади́и, влады́ки и кня́зи, дéвы и свящéнницы; где обря́щуся аз? Сего́ ра́ди вопию́: даждь ми, Го́споди, прéжде конца́ покая́ние.

Пресвятая Богородице, спаси нас.

Богородичен: Пречи́стая Богоро́дице, приими́ недосто́йную моли́тву мою́ и сохрани́ мя от на́глыя смéрти, и да́руй ми прéжде конца́ покая́ние.

Пресвятая Богородице, спаси нас.

По́мощи я́же от Тебé трéбующия не прéзри, Дéво, пою́щия и превознося́щия Тя во вéки.

Пресвятая Богородице, спаси нас.

Неможéние души́ моея́ исцеля́еши и телéсныя болéзни, Дéво, да Тя просла́влю, Чи́стая, во вéки.

Пресвятая Богородице, спаси нас.

Исцелéний бога́тство излива́еши вéрно пою́щим Тя, Дéво, и превознося́щим неизречéнное Твоé рождество́.

Пресвятая Богородице, спаси нас.

Напа́стей Ты прило́ги отгоня́еши и страстéй нахо́ды, Дéво: тéм же Тя поéм во вся вéки.

Святый Ангеле Божий, хранителю мой, моли Бога о мне.

От Бо́га по́сланный, утверди́ живо́т мой, раба́ твоего́, преблаги́й Ангеле, и не оста́ви менé во вéки.

Святый Ангеле Божий, хранителю мой, моли Бога о мне.

Ангела тя су́ща бла́га, души́ моея́ наста́вника и храни́теля, преблажéнне, воспеваю́ во вéки.

Слава: Бу́ди ми покро́в и забра́ло в день испыта́ния всех человéк, во́ньже огнéм искушаю́тся дела́ блага́я же и зла́я.

И ныне: Бу́ди ми помо́щница и тишина́, Богоро́дице Приснодéво, рабу́ Твоему́ и не оста́ви менé лишéна бы́ти Твоего́ влады́чества.

Песнь 9

Ирмос: Бо́га человéком невозмо́жно ви́дети, на Него́же не смéют чи́ни а́нгельстии взира́ти; Тобо́ю же, Всечи́стая, яви́ся человéком Сло́во Воплощéнно, Его́же велича́юще, с Небéсными Во́и Тя ублажа́ем.

Помилуй мя, Боже, помилуй мя.

Ны́не к вам прибегаю́, Ангели, Арха́нгели и вся Небéсныя Си́лы, у Престо́ла Бо́жия стоя́щии, моли́теся ко Творцу́ своему́, да изба́вит ду́шу мою́ от му́ки вéчныя.

Помилуй мя, Боже, помилуй мя.

Ны́не пла́чуся к вам, святи́и патриа́рси, ца́рие и проро́цы, апо́столи и святи́телие и вси избра́ннии Христо́вы: помози́те ми на судé, да спасéт ду́шу мою́ от си́лы вра́жия.

Помилуй мя, Боже, помилуй мя.

Ны́не к вам воздежу́ ру́це, святи́и му́ченицы, пусты́нницы, дéвственницы, пра́ведницы и вси святи́и, моля́щиися ко Го́споду за весь мир, да поми́лует мя в час смéрти моея́.

Пресвятая Богородице, спаси нас.

Богородичен: Ма́ти Бо́жия, помози́ ми, на Тя си́льне надею́щемуся, умоли́ Сы́на Своего́, да поста́вит мя недосто́йнаго одесную́ Себé, егда́ ся́дет судя́й живы́х и мéртвых, ами́нь.

Пресвятая Богородице, спаси нас.

То́ка слез мои́х не отврати́ся, Яже от вся́каго лица́ вся́ку слéзу отъéмшаго, Дéво, Христа́ ро́ждшая.

Пресвятая Богородице, спаси нас.

Ра́дости моé сéрдце испо́лни, Дéво, Яже ра́дости приéмшая исполнéние, грехо́вную печа́ль потребля́ющи.

Пресвятая Богородице, спаси нас.

Приста́нище и предста́тельство к Тебé прибега́ющих бу́ди, Дéво, и стена́ неруши́мая, прибéжище же и покро́в и весéлие.

Пресвятая Богородице, спаси нас.

Свéта Твоего́ заря́ми просвети́, Дéво, мрак невéдения отгоня́ющи, благовéрно Богоро́дицу Тя исповéдающих.

Пресвятая Богородице, спаси нас.

На мéсте озлоблéния нéмощи смири́вшагося, Дéво, исцели́, из нездра́вия во здра́вие претворя́ющи.

Иисусу: Го́споди Иису́се Христé Бо́же мой, поми́луй мя.

Поми́луй мя, еди́не Спа́се мой, я́ко ми́лостив еси́ и милосéрд, и пра́ведных лико́в сотвори́ мя прича́стника.

Святый Ангеле Божий, хранителю мой, моли Бога о мне.

Мы́слити ми при́сно и твори́ти, Госпо́день Ангеле, блага́я и полéзная да́руй, я́ко си́льна яви́ в нéмощи и непоро́чна.

Слава: Яко имея́ дерзновéние к Царю́ Небéсному, Того́ моли́, с про́чими безпло́тными, поми́ловати мя окая́ннаго.

И ныне: Мно́го дерзновéние иму́щи, Дéво, к Вопло́щшемуся из Тебé, преложи́ мя от уз и разрешéние ми пода́ждь и спасéние, моли́твами Твои́ми.

Молитва ко Господу нашему Иисусу Христу

Влады́ко Христé Бо́же, Иже страстьми́ Свои́ми стра́сти моя́ исцели́вый и я́звами Свои́ми я́звы моя́ уврачева́вый, да́руй мне, мно́го Тебé прегреши́вшему, слéзы умилéния; сраствори́ моему́ тéлу от обоня́ния Животворя́щаго Тéла Твоего́, и наслади́ ду́шу мою́ Твоéю Честно́ю Кро́вию от го́рести, ею́ же мя сопроти́вник напои́; возвы́си мой ум к Тебé, до́лу пони́кший, и возведи́ от про́пасти поги́бели: я́ко не и́мам покая́ния, не и́мам умилéния, не и́мам слезы́ утéшительныя, возводя́щия ча́да ко своему́ наслéдию. Омрачи́хся умо́м в житéйских страстéх, не могу́ воззрéти к Тебé в болéзни, не могу́ согрéтися слеза́ми, я́же к Тебé любвé. Но, Влады́ко Го́споди Иису́се Христé, Сокро́вище благи́х, да́руй мне покая́ние всецéлое и сéрдце люботру́дное во взыска́ние Твоé, да́руй мне благода́ть Твою́ и обнови́ во мне зра́ки Твоего́ о́браза. Оста́вих Тя, не оста́ви менé; изы́ди на взыска́ние моé, возведи́ к па́жити Твоéй и сопричти́ мя овца́м избра́ннаго Твоего́ ста́да, воспита́й мя с ни́ми от зла́ка Божéственных Твои́х Та́инств, моли́твами Пречи́стыя Твоея́ Ма́тере и всех святы́х Твои́х. Ами́нь.

Молитвы ко Пресвятой Богородице

Цари́це моя́ преблага́я, надéждо моя́ Богоро́дице, прия́телище си́рых и стра́нных предста́тельнице, скорбя́щих ра́досте, оби́димых покрови́тельнице! Зри́ши мою́ беду́, зри́ши мою́ скорбь, помози́ ми я́ко нéмощну, окорми́ мя я́ко стра́нна. Оби́ду мою́ вéси, разреши́ ту, я́ко во́лиши: я́ко не и́мам ины́я по́мощи ра́зве Тебé, ни ины́я предста́тельницы, ни благи́я утéшительницы, то́кмо Тебé, о Богома́ти, я́ко да сохрани́ши мя и покры́еши во вéки веко́в. Ами́нь.

К кому́ возопию́, Влады́чице? К кому́ прибéгну в го́рести моéй, а́ще не к Тебé, Цари́це Небéсная? Кто плач мой и воздыха́ние моé прии́мет, а́ще не Ты, Пренепоро́чная, надéждо христиа́н и прибéжище нам, грéшным? Кто па́че Тебé в напа́стех защити́т? Услы́ши у́бо стена́ние моé, и приклони́ у́хо Твоé ко мне, Влады́чице Ма́ти Бо́га моего́, и не прéзри менé, трéбующаго Твоея́ по́мощи, и не отри́ни менé, грéшнаго. Вразуми́ и научи́ мя, Цари́це Небéсная; не отступи́ от менé, раба́ Твоего́, Влады́чице, за ропта́ние моé, но бу́ди мне Ма́ти и засту́пница. Вруча́ю себé ми́лостивому покро́ву Твоему́: приведи́ мя, грéшнаго, к ти́хой и безмятéжней жи́зни, да пла́чуся о гресéх мои́х. К кому́ бо прибéгну пови́нный аз, а́ще не к Тебé, упова́нию и прибéжищу грéшных, надéждою на неизречéнную ми́лость Твою́ и щедро́ты Твоя́ окриля́емь? О, Влады́чице Цари́це Небéсная! Ты мне упова́ние и прибéжище, покро́в и заступлéние и по́мощь. Цари́це моя́ преблагая́ и ско́рая засту́пнице! Покры́й Твои́м хода́тайством моя́ прегрешéния, защити́ менé от враг ви́димых и неви́димых; умягчи́ сердца́ злых человéк, возстаю́щих на мя. О, Ма́ти Го́спода моего́ Творца́! Ты еси́ ко́рень дéвства и неувяда́емый цвет чистоты́. О, Богороди́тельнице! Ты пода́ждь ми по́мощь немощству́ющему плотски́ми страстьми́ и болéзнующему сéрдцем, еди́но бо Твоé и с Тобо́ю Твоего́ Сы́на и Бо́га на́шего и́мам заступлéние; и Твои́м пречу́дным заступлéнием да изба́влюся от вся́кия бéды и напа́сти, о пренепоро́чная и пресла́вная Бо́жия Ма́ти Мари́е. Тéмже со упова́нием глаго́лю и вопию́: ра́дуйся, благода́тная, ра́дуйся, обра́дованная; ра́дуйся, преблагословéнная, Госпо́дь с Тобо́ю.

Молитва Ангелу Хранителю

Ангеле Христо́в святы́й, к тебé припа́дая молю́ся, храни́телю мой святы́й, прида́нный мне на соблюдéние души́ и тéлу моему́ грéшному от свята́го крещéния, аз же своéю лéностию и свои́м злым обы́чаем прогнéвах твою́ пречи́стую свéтлость и отгна́х тя от себé всéми сту́дными дéлы: лжа́ми, клевета́ми, за́вистию, осуждéнием, презо́рством, непоко́рством, братоненавидéнием, и злопомнéнием, сребролю́бием, прелюбодея́нием, я́ростию, ску́постию, объядéнием без сы́тости и опи́вством, многоглаго́ланием, злы́ми по́мыслы и лука́выми, го́рдым обы́чаем и блу́дным возбешéнием, имы́й самохотéние на вся́кое плотско́е вожделéние. О зло́е моé произволéние, его́ же и ско́ти безсловéснии не творя́т! Да ка́ко возмо́жеши воззрéти на мя, или́ приступи́ти ко мне, а́ки псу смердя́щему? Кото́рыма очи́ма, Ангеле Христо́в, воззри́ши на мя, оплéтшася зле во гну́сных дéлех? Да ка́ко ужé возмогу́ отпущéния проси́ти го́рьким и злым мои́м и лука́вым дея́нием, в ня́же впада́ю по вся дни и но́щи и на всяк час? Но молю́ся ти припа́дая, храни́телю мой святы́й, умилосéрдися на мя грéшнаго и недосто́йнаго раба́ твоего́ (имя), бу́ди ми помо́щник и засту́пник на зла́го моего́ сопроти́вника, святы́ми твои́ми моли́твами, и Ца́рствия Бо́жия прича́стника мя сотвори́ со всéми святы́ми, всегда́, и ны́не и при́сно и во вéки веко́в. Ами́нь.

Моли́твами святы́х отéц нáших, Гóсподи Иису́се Христé Бóже наш, поми́луй нас. Ами́нь.

Царю́ Небéсный, Утéшителю, Ду́ше и́стины, И́же вездé сый и вся исполня́яй, Сокрóвище благи́х и жи́зни Подáтелю, прииди́ и всели́ся в ны, и очи́сти ны от вся́кия сквéрны, и спаси́, Блáже, ду́ши нáша.

Святы́й Бóже, Святы́й Крéпкий, Святы́й Безсмéртный, поми́луй нас (трижды).

Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.

Пресвятáя Трóице, поми́луй нас; Гóсподи, очи́сти грехи́ нáша; Влады́ко, прости́ беззакóния нáша; Святы́й, посети́ и исцели́ нéмощи нáша, и́менé Твоегó рáди.

Гóсподи поми́луй (трижды).

Слáва (*далее - Слáва Отцу́ и Сы́ну и Святóму Ду́ху), и ны́не (*далее - и ны́не и при́сно и во вéки векóв. Ами́нь.):

Óтче наш, И́же еси́ на небесéх! Да святи́тся и́мя Твоé, да прии́дет Цáрствие Твоé, да бу́дет вóля Твоя́, я́ко на небеси́ и на земли́ Хлеб наш насу́щный даждь нам днесь; и остáви нам дóлги нáша, я́коже и мы оставля́ем должникóм на́шим; и не введи́ нас во искушéние, но избáви нас от лукáваго.

Гóсподи поми́луй (12раз).

Прииди́те, поклони́мся Царéви нáшему Бóгу. (Поклон)

Прииди́те, поклони́мся и припадéм Христу́, Царéви нáшему Бóгу. (Поклон)

Прииди́те, поклони́мся и припадéм Самому́ Христу́, Царéви и Бóгу нáшему. (Поклон)

Псалом 22

Госпóдь пасéт мя, и ничтóже мя лиши́т. На мéсте злáчне, тáмо всéли мя, на водé покóйне воспитá мя. Ду́шу мою́ обрати́, настáви мя на стези́ прáвды, и́мене рáди Своегó. Áще бо и пойду́ посредé сéни смéртныя, не убою́ся зла, я́ко Ты со мнóю еси́, жезл Твой и пáлица Твоя́, та мя утéшиста. Уготóвал еси́ прéдо мнóю трапéзу сопроти́в стужáющым мне, умасти́л еси́ елéом главу́ мою́, и чáша Твоя́ упоявáющи мя, я́ко держáвна. И ми́лость Твоя́ поженéт мя вся дни животá моегó, и éже всели́ти ми ся в дом Госпóдень, в долготу́ дний.

Псалом 23

Госпóдня земля́, и исполнéние ея́, вселéнная и вси живу́щии на ней. Той на моря́х основáл ю́ есть, и на рекáх уготóвал ю́ есть. Кто взы́дет на гóру Госпóдню? Или́ кто стáнет на мéсте святéм Егó? Непови́нен рукáма, и чист сéрдцем, и́же не прия́т всу́е ду́шу свою́, и не кля́тся лéстию и́скреннему своему́. Сей прии́мет благословéние от Гóспода, и ми́лостыню от Бóга Спáса своегó. Сей род и́щущих Гóспода, и́щущих лицé Бо́га Иáковля. Возми́те вратá кня́зи вáша, и возми́теся вратá вéчная, и вни́дет Царь слáвы. Кто есть сей Царь слáвы? Госпóдь крéпок и си́лен, Госпóдь си́лен в брáни. Возми́те вратá кня́зи вáша, и возми́теся врáта вéчная, и вни́дет Царь слáвы. Кто есть сей Царь слáвы? Госпóдь сил, Той есть Царь слáвы.

Псалом 115

Вéровах, тéмже возглагóлах, аз же смири́хся зелó. Аз же рех во изступлéнии моéм: всяк человéк ложь. Что воздáм Гóсподеви о всех, я́же воздадé ми? Чáшу спасéния прииму́ и и́мя Госпóдне призову́, моли́твы моя́ Гóсподеви воздáм пред всéми людьми́ Егó. Честнá пред Гóсподем смерть преподóбных Егó. О, Гóсподи, аз раб Твой, аз раб Твой, и сын рабы́ни Твоея́; растерзáл еси́ у́зы моя́. Тебé пожру́ жéртву хвалы́, и во и́мя Госпóдне призову́. Моли́твы моя́ Гóсподеви воздáм пред всéми людьми́ Егó, во дворéх дóму Госпóдня, посредé тебé, Иерусали́ме.

Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.

Аллилу́иа, аллилу́иа, аллилу́иа, слава Тебе, Боже (трижды). И три поклона.

Тропари, глас 8-й

Беззакóния моя́ прéзри, Гóсподи, от Дéвы рождéйся, и сéрдце моé очи́сти, храм то творя́ пречи́стому Твоему́ Тéлу и Крóви, нижé отри́ни менé от Твоегó лицá, без числá имéяй вéлию ми́лость.

Слав: Во причáстие святы́нь Твои́х кáко дерзну́, недостóйный? Áще бо дерзну́ к Тебé приступи́ти с достóйными, хитóн мя обличáет, я́ко несть вечéрний, и осуждéние исходáтайствую многогрéшной души́ моéй. Очи́сти, Гóсподи, сквéрну души́ моея́, и спаси́ мя, я́ко Человеколю́бец.

И ныне: Мнóгая мнóжества мои́х, Богорóдице, прегрешéний, к Тебé прибегóх, Чи́стая, спасéния трéбуя: посети́ немощству́ющую мою́ ду́шу, и моли́ Сы́на Твоегó и Бóга нáшего, дáти ми оставлéние, я́же содéях лю́тых, еди́на Благословéнная.

[Во святую же Четыредесятницу:

Егдá слáвнии ученицы́ на умовéнии вéчери просвещáхуся, тогдá Иу́да злочести́вый сребролю́бием неду́говав омрачáшеся, и беззакóнным судия́м Тебé прáведнаго Судию́ предаéт. Ви́ждь, имéний рачи́телю, сих ради́ удавлéние употреби́вша: бежи́ несы́тыя души́, Учи́телю таковáя дерзну́вшия. И́же о всех благи́й Гóсподи, слáва Тебé.]

Псалом 50

Поми́луй мя, Бóже, по вели́цей ми́лости Твоéй, и по мнóжеству щедрóт Твои́х очи́сти беззакóние моé. Наипáче омы́й мя от беззакóния моегó, и от грехá моегó очи́сти мя; я́ко беззакóние моé аз знáю, и грех мой прéдо мнóю есть вы́ну. Тебé еди́ному согреши́х и лукáвое пред Тобóю сотвори́х; я́ко да оправди́шися во словесéх Твои́х, и победи́ши внегдá суди́ти Ти. Се бо в беззакóниих зачáт есмь, и во гресéх роди́ мя мáти моя́. Се бо и́стину возлюби́л еси́; безвéстная и тáйная прему́дрости Твоея́ яви́л ми еси́. Окропи́ши мя иссóпом, и очи́щуся; омы́еши мя, и пáче снéга убелю́ся. Слу́ху моему́ дáси рáдость и весéлие; возрáдуются кóсти смирéнныя. Отврати́ лицé Твоé от грех мои́х и вся беззакóния моя́ очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó и Ду́ха Твоегó Святáго не отыми́ от менé. Воздáждь ми рáдость спасéния Твоегó и Ду́хом Влады́чним утверди́ мя. Научу́ беззакóнныя путéм Твои́м, и нечести́вии к Тебé обратя́тся. Избáви мя от кровéй, Бóже, Бóже спасéния моегó; возрáдуется язы́к мой прáвде Твоéй. Гóсподи, устнé мои́ отвéрзеши, и устá моя́ возвестя́т хвалу́ Твою́. Я́ко áще бы восхотéл еси́ жéртвы, дал бых у́бо: всесожжéния не благоволи́ши. Жéртва Бóгу дух сокрушéн; сéрдце сокрушéнно и смирéнно Бог не уничижи́т. Ублажи́, Гóсподи, благоволéнием Твои́м Сиóна, и да сози́ждутся стéны Иерусали́мския. Тогдá благоволи́ши жéртву прáвды, возношéние и всесожегáемая; тогдá возложáт на олтáрь Твои́ тельцы́.

Канон, глас 2-й

Песнь 1

Ирмос: Гряди́те, лю́дие, пои́м песнь Христу́ Бóгу, раздéльшему мóре, и настáвльшему лю́ди, я́же изведé из рабóты еги́петския, я́ко прослáвися.

Припев: Сéрдце чи́сто сози́жди во мне, Бóже, и дух прав обнови́ во утрóбе моéй.

Хлеб животá вéчнующаго да бу́дет ми Тéло Твоé Святóе, благоутрóбне Гóсподи, и Честнáя Кровь, и неду́г многообрáзных исцелéние.

Припев: Не отвéржи менé от лицá Твоегó, и Ду́ха Твоегó Святáго не отыми́ от менé.

Осквернéн дéлы безмéстными окая́нный, Твоегó Пречи́стаго Тéла и Божéственныя Крóве недостóин есмь, Христé, причащéния, егóже мя сподóби.

Припев: Пресвятáя Богорóдице, спаси́ нас.

Земле благáя, благословéнная Богоневéсто, клас прозя́бшая неорáнный и спаси́тельный ми́ру, сподóби мя сей яду́ща спасти́ся.

Песнь 3

Ирмос: На кáмени мя вéры утверди́в, разшири́л ecи́ устá моя́ на враги́ моя́. Возвесели́ бо ся дух мой, внегдá пéти: несть свят, я́коже Бог наш, и несть прáведен пáче Тебé, Гóсподи.

Сéрдце чи́сто сози́жди во мне, Бóже, и дух прав обнови́ во утрóбе моéй.

Слéзныя ми подáждь, Христé, кáпли, сквéрну сéрдца моегó очищáющия: я́ко да благóю сóвестию очи́щен, вéрою прихожду́ и стрáхом, Влады́ко, ко причащéнию Божéственных даро́в Твои́х.

Не отвéржи менé от лицá Твоегó, и Ду́ха Твоегó Святáго не отыми́ от менé.

Во оставлéние да бу́дет ми прегрешéний Пречи́стое Тéло Твоé, и Божéственная Кровь, Ду́ха же Святáго общéние, и в жизнь вéчную, Человеколю́бче, и страстéй и скорбéй отчуждéние.

Пресвятáя Богорóдице, спаси́ нас.

Хлéба живóтнаго Трапéза Пресвятáя, свы́ше ми́лости рáди сшéдшаго, и ми́рови нóвый живóт даю́щаго, и менé ны́не сподóби недостóйнаго, со стрáхом вкуси́ти сегó, и жи́ву бы́ти.

Песнь 4

Ирмос: Пришéл еси́ от Дéвы, не ходáтай, ни Áнгел, но Сам, Гóсподи, воплóщься, и спасл еси́ всегó мя человéка. Тем зову́ Ти: слáва си́ле Твоéй, Гóсподи.

Сéрдце чи́сто сози́жди во мне, Бóже, и дух прав обнови́ во утрóбе моéй.

Восхотéл еси́, нас рáди воплóщься, Многоми́лостиве, заклáн бы́ти я́ко овчá, грех рáди человéческих: тéмже молю́ Тя, и моя́ очи́сти согрешéния.

Не отвéржи менé от лицá Твоегó, и Ду́ха Твоегó Святáго не отыми́ от менé.

Исцели́ души́ моея́ я́звы, Гóсподи, и всегó освяти́: и сподóби, Влады́ко, я́ко да причащу́ся тáйныя Твоея́ Божéственныя вéчери, окая́нный.

Пресвятáя Богорóдице, спаси́ нас.

Уми́лостиви и мне Су́щаго от утрóбы Твоея́, Влады́чице, и соблюди́ мя несквéрна рабá Твоегó и непорóчна, я́ко да приéм у́мнаго би́сера, освящу́ся.

Песнь 5

Ирмос: Свéта подáтелю и векóв Твóрче, Гóсподи, во свéте Твои́х повелéний настиáви нас; рáзве бо Тебé инóго бóга не знáем.

Сéрдце чи́сто сози́жди во мне, Бóже, и дух прав обнови́ во утрóбе моéй.

Я́коже предрéкл еси́, Христé, да бу́дет у́бо худóму рабу́ Твоéму, и во мне пребу́ди, я́коже обещáлся еси́: се бо Тéло Твоé ям Божéственное, и пию́ Кровь Твою́.

Не отвéржи менé от лицá Твоегó, и Ду́ха Твоегó Святáго не отыми́ от менé.

Слóве Бóжий и Бóже, угль Тéла Твоегó да бу́дет мне помрачéнному в просвещéние, и очищéние осквернéнной души́ моéй Кровь Твоя́.

Пресвятáя Богорóдице, спаси́ нас.

Мари́е, Мáти Бóжия, благоухáния честнóе селéние, Твои́ми моли́твами сосу́д мя избрáнный содéлай, я́ко да освящéний причащу́ся Сы́на Твоего́.

Песнь 6

Ирмос: В бéздне грехóвней валя́яся, неизслéдную милосéрдия Твоегó призывáю бéздну: от тли, Бóже, мя возведи́.

Сéрдце чи́сто сози́жди во мне, Бóже, и дух прав обнови́ во утрóбе моéй.

Ум, ду́шу и сéрдце освяти́, Спáсе, и тéло моé, и сподóби неосуждéнно, Влады́ко, к стрáшным Тáйнам приступи́ти.

Не отвéржи менé от лицá Твоегó, и Ду́ха Твоегó Святáго не отыми́ от менé.

Да бых устрани́лся от страстéй, и Твоея́ благодáти имéл бы приложéние, животá же утверждéние, причащéнием Святы́х, Христé, Тáин Твои́х.

Пресвятáя Богорóдице, спаси́ нас.

Бóжие, Бóже, Слóво Святóе, всегó мя освяти́, ны́не приходя́щаго к Божéственным Твои́м Тáйнам, Святы́я Мáтере Твоея́ мольбáми.

Кондак, глас 2-й

Хлеб, Христé, взя́ти не прéзри мя, Тéло Твоé, и Божéственную Твою́ ны́не Кровь, пречи́стых, Влады́ко, и стрáшных Твои́х Тáин причасти́тися окая́ннаго, да не бу́дет ми в суд, да бу́дет же ми в живóт вéчный и безсмéртный.

Песнь 7

Ирмос: Тéлу златóму прему́дрыя дéти не послужи́ша, и в плáмень сáми поидóша, и бóги их обругáша, среди́ плáмене возопи́ша, и ороси́я Áнгел: услы́шася уже уст вáших моли́тва.

Сéрдце чи́сто сози́жди во мне, Бóже, и дух прав обнови́ во утрóбе моéй.

Истóчник благи́х, причащéние, Христé, безсмéртных Твои́х ны́не Тáинств да бу́дет ми свет, и живóт, и безстрáстие, и к преспея́нию же и умножéнию добродéтели божéственнеи́ший ходатáйственно, еди́не Блáже, я́ко да слáвлю Тя.

Не отвéржи менé от лицá Твоегó, и Ду́ха Твоегó Святáго не отыми́ от менé.

Да избáвлюся от страстéй, и врагóв, и ну́жды, и вся́кия скóрби, трéпетом и любóвию со благоговéнием, Человеколю́бче, приступáяй ны́не к Твои́м безсмéртным и Божéственным Тáйнам, и пéти Тебé сподóби: благословéн еси́, Гóсподи, Бóже отéц нáших.

Пресвятáя Богорóдице, спаси́ нас.

Спáса Христá рóждшая пáче ума, Богоблагодáтная, молю́ Тя ны́не, раб Твой, Чи́стую нечи́стыи́: хотя́щаго мя ны́не к пречи́стым Тáйнам приступи́ти, очи́сти всегó от сквéрны плóти и ду́ха.

Песнь 8

Ирмос: В пещь óгненную ко óтроком еврéйским снизшéдшаго, и плáмень в росу́ прелóжшаго Бóга, пóйте делá, я́ко Гóспода, и превозноси́те во вся вéки.

Сéрдце чи́сто сози́жди во мне, Бóже, и дух прав обнови́ во утрóбе моéй.

Небéсных, и стрáшных, и святы́х Твои́х, Христé, ны́не Тáин, и Божéственныя Твоея́ и тáйный вéчери óбщника бы́ти и менé сподóби отчáяннаго, Бóже Спáсе мой.

Не отвéржи менé от лицá Твоегó, и Ду́ха Твоегó Святáго не отыми́ от менé.

Под Твоé прибéг благоутрóбие, Блáже, со стрáхом зову́ Ти: во мне пребу́ди, Спáсе, и аз, я́коже рекл еси́, в Тебé; се бо дерзáя на ми́лость Твою́, ям Тéло Твоé, и пию́ Кровь Твою́.

Припев: Пресвятáя Трóице, Бóже наш, слáва Тебé.

Троичен: Трепещу́, приéмля огнь, да не опалю́ся я́ко воск и я́ко травá; óле стрáшнаго тáинства! óле благоутрóбия Бóжия! Кáко Божéственнаго Тéла и Крóве брéние причащáюся, и нетлéнен сотворя́юся?

Песнь 9

Ирмос: Безначáльна Роди́теля Сын, Бог и Госпóдь, воплóщься от Дéвы нам яви́ся, омрачéнная просвети́ти, собрáти расточéнная: тем всепéтую Богорóдицу величáем.

Сéрдце чи́сто сози́жди во мне, Бóже, и дух прав обнови́ во утрóбе моéй.

Христóс есть, вкуси́те и ви́дите: Госпóдь нас рáди, по нам бо дрéвле бы́вый, еди́ною Себé принéс, я́ко приношéние Отцу́ Своему́, при́сно закаля́ется, освящáяй причащáющияся.

Не отвéржи менé от лицá Твоегó, и Ду́ха Твоегó Святáго не отыми́ от менé.

Душéю и тéлом да освящу́ся, Влады́ко, да просвещу́ся, да спасу́ся, да бу́ду дом Твой причащéнием свящéнных Тáин, живу́щаго Тя имéя в себé со Отцéм и Ду́хом, Благодéтелю Многоми́лостиве.

Припев: Воздáждь ми рáдость спасéния Твоегó и Ду́хом Влады́чним утверди́ мя.

Я́коже огнь да бу́дет ми, и я́ко свет, Тéло Твоé и Кровь, Спáсе мой, пречестнáя, опаля́я грехóвное веществó, сжигáя же страстéй тéрние, и всегó мя просвещáя, покланя́тися Божеству́ Твоéму.

Пресвятáя Богорóдице, спаси́ нас.

Бог воплóтися от чи́стых кровéй Твои́х; тéмже вся́кий род поéт Тя, Влады́чице, у́мная же мнóжества слáвят, я́ко Тобóю я́ве узрéша всéми Влады́чествующаго, осуществовáвшагося человéчеством.

Достóйно есть я́ко вои́стинну блажи́ти Тя Богорóдицу, Присноблажéнную и Пренепорóчную и Мáтерь Бо́га нáшего. Честнéйшую Херуви́м и славнéй́шую без сравнéния Серафи́м, без истлéния Бóга Слóва рóждшую, су́щую Богорóдицу Тя величáем.

Святы́й Бóже, Святы́й Крéпкий, Святы́й Безсмéртный, поми́луй нас (трижды).

Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.

Пресвятáя Трóице, поми́луй нас; Гóсподи, очи́сти грехи́ нáша; Влады́ко, прости́ беззакóния нáша; Святы́й, посети́ и исцели́ нéмощи нáша, и́мене Твоегó рáди.

Го́споди поми́луй (трижды).

Слáва, и ны́не:

Óтче наш, И́же еси́ на небесéх! Да святи́тся и́мя Твоé, да прии́дет Цáрствие Твоé, да бу́дет вóля Твоя́, я́ко на небеси́ и на земли́. Хлеб наш насу́щный даждь нам днесь; и остáви нам дóлги нáша, я́коже и мы оставля́ем должникóм нáшим; и не введи́ нас во искушéние, но избáви нас от лукáваго.

Тропарь дня, или праздника. Если неделя, тропарь воскресный по гласу. Если же нет, настоящие тропари, глас 6-й:

Поми́луй нас, Гóсподи, поми́луй нас; вся́каго бо отвéта недоумéюще, сию́ Ти моли́тву, я́ко Влады́це, грéшнии принóсим: поми́луй нас.

Слава: Гóсподи, поми́луй нас, на Тя бо уповáхом; не прогнéвайся на ны зелó, нижé помяни́ беззакóний нáших, но при́зри и ны́не я́ко благоутрóбен, и избáви ны от враг нáших. Ты бо еси́ Бог наш, и мы лю́дие Твои́, вси делá руку́ Твоéю, и и́мя Твоé призывáем.

И ныне: Милосéрдия двéри отвéрзи нам, благословéнная Богоро́дице, надéющиися на Тя да не поги́бнем, но да избáвимся Тобóю от бед: Ты бо еси́ спасéние рóда христиáнскаго.

Гóсподи поми́луй (40).

И поклоны, сколько хочешь.

И стихи:

Хотя́ я́сти, человéче, Тéло Влады́чне,

Стрáхом приступи́, да не опали́шися: огнь бо есть.

Божéственную же пия́ Кровь ко общéнию,

Пéрвее примири́ся тя опечáлившим.

Тáже дерзáя, тáинственное брáшно яждь.

Прéжде причáстия стрáшныя жéртвы,

Животворя́щаго Тéла Влады́чня,

Сим помоли́ся óбразом со трéпетом:

Молитва Василия Великого, 1-я

Влады́ко Гóсподи Иису́се Христé, Бóже наш, истóчниче жи́зни и безсмéртия, всея́ твáри ви́димыя и неви́димыя Содéтелю, безначáльнаго Отцá соприсносу́щный Сы́не и собезначáльный, премнóгия рáди блáгости в послéдния дни в плоть оболки́йся, и распны́йся, и погребы́йся за ны неблагодáрныя и злонрáвныя, и Твоéю крóвию обнови́вый растлéвшее грехóм естествó нáше, Сам, Безсмéртный Царю́, приими́ и моé грéшнаго покая́ние, и приклони́ у́хо Твоé мне, и услы́ши глагóлы моя́. Согреши́х бо, Гóсподи, согреши́х на нéбо и пред Тобóю, и несмь достóин воззрéти на высóту слáвы Твоея́: прогнéвах бо Твою́ блáгость, Твоя́ зáповеди преступи́в, и не послу́шав Твои́х повелéний. Но Ты, Гóсподи, незлóбив сый, долготерпели́в же и многоми́лостив, не предáл еси́ мя поги́бнути со беззакóньми мои́ми, моегó вся́чески ожидáя обращéния. Ты бо рекл еси́, Человеколю́бче, прорóком Твои́м: я́ко хотéнием не хощу́ смéрти грéшника, но éже обрати́тися и жи́ву бы́ти ему́. Не хóщеши бо, Влады́ко, создáния Твоéю руку́ погуби́ти, нижé благоволи́ши о поги́бели человéчестей, но хóщеши всем спасти́ся, и в рáзум и́стины приити́. Тéмже и аз, áще и недостóин есмь небесé и земли́, и сея́ приврéменныя жи́зни, всегó себé повину́в греху́, и сластéм порабóтив, и Твой оскверни́в óбраз; но творéние и создáние Твоé быв, не отчаявáю своегó спасéния окая́нный, на Твоé же безмéрное благоутрóбие дерзáя, прихожду́. Приими́ у́бо и менé, Человеколю́бче Гóсподи, я́коже блудни́цу, я́ко разбóйника, я́ко мытаря́ и я́ко блу́днаго, и возми́ моé тя́жкое брéмя грехóв, грех взéмляй ми́ра, и нéмощи человéческия исцеля́яй, труждáющияся и обременéнныя к Себé призывáяй и упокоевáяй, не пришéдый призвáти прáведныя, но грéшныя на покая́ние. И очи́сти мя от вся́кия сквéрны плóти и ду́ха, и научи́ мя совершáти святы́ню во стрáсе Твоéм: я́ко да чи́стым свéдением сóвести моея́, святы́нь Твои́х часть приéмля, соединю́ся святóму Тéлу Твоему́ и Крóви, и имéю Тебé во мне живу́ща и пребывáюща, со Отцéм и Святы́м Твои́м Ду́хом. Ей, Гóсподи Иису́се Христé, Бóже мой, и да не в суд ми бу́дет причáстие пречи́стых и животворя́щих Тáин Твои́х, нижé да нéмощен бу́ду душéю же и тéлом, от éже недостóйне тем причащáтися, но даждь ми, дáже до конéчнаго моегó издыхáния, неосуждéнно восприимáти часть святы́нь Твои́х, в Ду́ха Святáго общéние, в напу́тие животá вéчнаго, и во благоприя́тен отвéт на Стрáшнем Суди́щи Твоéм: я́ко да и аз со всéми избрáнными Твои́ми óбщник бу́ду нетлéнных Твои́х благ, я́же уготóвал еси́ лю́бящим Тя, Гóсподи, в ни́хже препрослáвлен еси́ во вéки. Ами́нь.

Молитва святого Иоанна Златоустого, 2-я

Гóсподи Бóже мой, вем, я́ко несмь достóин, нижé довóлен, да под кров вни́деши хрáма души́ моея́, занéже весь пуст и пáлся есть, и не и́маши во мне мéста достóйна éже главу́ подклони́ти; но я́коже с высоты́ нас рáди смири́л еси́ Себé, смири́ся и ны́не смирéнию моему́; и я́коже восприя́л еси́ в вертéпе и в я́слех безсловéсных возлещи́, си́це восприими́ и в я́слех безсловéсныя моея́ души́, и во осквернéнное моé тéло вни́ти. И я́коже не неудостóил еси́ вни́ти, и свечеря́ти со грéшники в дому́ Си́мона прокажéннаго, тáко извóли вни́ти и в дом смирéнныя моея́ души́, прокажéнныя и грéшныя; и я́коже не отри́нул еси́ подóбную мне блудни́цу и грéшную, пришéдшую и прикосну́вшуюся Тебé, си́це умилосéрдися и о мне грéшнем, приходя́щем и прикасáющем Ти ся; и я́коже не возгнушáлся еси́ сквéрных ея уст и нечи́стых, целу́ющих Тя, нижé мои́х возгнушáйся сквéрнших óныя уст и нечи́стших, нижé мéрзких мои́х и нечи́стых устéн, и сквéрнаго и нечи́стейшаго моегó язы́ка. Но да бу́дет ми угль пресвятáго Твоегó Тéла, и честны́я Твоея́ Крóве, во освящéние и просвещéние и здрáвие смирéнней моéй души́ и тéлу, во облегчéние тя́жестей мнóгих мои́х согрешéний, в соблюдéние от вся́каго диáвольскаго дéйства, во отгнáние и возбранéние злáго моегó и лукáваго обы́чая, во умерщвлéние страстéй, в снабдéние зáповедей Твои́х, в приложéние Божéственныя Твоея́ благодáти, и Твоегó Цáрствия присвоéние. Не бо я́ко презирáяй прихожду́ к Тебé, Христé Бóже, но я́ко дерзáя на неизречéнную Твою́ блáгость, и да не на мнóзе удаля́яйся общéния Твоегó, от мы́сленнаго вóлка звероуловлéн бу́ду. Тéмже молю́ся Тебé: я́ко еди́н сый Свят, Влады́ко, освяти́ мою́ ду́шу и тéло, ум и сéрдце, чревесá и утро́бы, и всего́ мя обнови́, и вкорени́ стрáх Твой во удесéх мои́х, и освящéние Твоé неотъéмлемо от менé сотвори́; и бу́ди ми помóщник и засту́пник, окормля́я в ми́ре живóт мой, сподобля́я мя и одесну́ю Тебé предстоя́ния со святы́ми Твои́ми, моли́твами и молéньми Пречи́стыя Твоея́ Мáтере, невещéственных Твои́х служи́телей и пречи́стых сил, и всех святы́х, от вéка Тебé благоугоди́вших. Ами́нь.

Молитва Симеона Метафраста, 3-я

Еди́не чи́стый и нетлéнный Гóсподи, за неизречéнную ми́лость человеколю́бия нáше все восприéмый смешéние, от чи́стых и дéвственных кровéй пáче естествá Рóждшия Тя, Ду́ха Божéственнаго нашéствием, и благоволéнием Отцá присносу́щнаго, Христé Иису́се, прему́дросте Бóжия, и ми́ре, и си́ло; Твои́м восприя́тием животворя́щая и спаси́тельная страдáния восприéмый, крест, гвóздия, копиé, смерть, умертви́ моя́ душетлéнныя стрáсти телéсныя. Погребéнием Твои́м áдова плени́вый цáрствия, погреби́ моя́ благи́ми помы́слы лукáвая совéтования, и лукáвствия ду́хи разори́. Триднéвным Твои́м и живонóсным воскресéнием пáдшаго прáотца возстáвивый, возстáви мя грехóм попóлзшагося, óбразы мне покая́ния предлагáя. Преслáвным Твои́м вознесéнием плотскóе обожи́вый восприя́тие, и сиé десны́м Отцá седéнием почты́й, сподóби мя причáстием святы́х Твои́х Тáин десну́ю часть спасáемых получи́ти. Сни́тием Утéшителя Твоего́ Ду́ха сосу́ды чéстны свящéнныя Твоя́ ученики́ содéлавый, прия́телище и менé покажи́ Тогó пришéствия. Хотя́й пáки приити́ суди́ти вселéнней прáвдою, благоволи́ и мне усрéсти Тя на óблацех, Судию́ и Создáтеля моегó, со всéми святы́ми Твои́ми: да безконéчно славослóвлю и воспевáю Тя со безначáльным Твои́м Отцéм и Пресвяты́м и Благи́м и Животворя́щим Твои́м Ду́хом, ны́не и при́сно и во вéки векóв. Ами́нь.

Молитва святого Иоанна Дамаскина, 4-я

Влады́ко Гóсподи Иису́се Христé, Бóже наш, еди́не имéяй власть человéком оставля́ти грехи́, я́ко благ и Человеколю́бец прéзри моя́ вся в вéдении и не в вéдении прегрешéния, и сподóби мя неосуждéнно причасти́тися Божéственных, и преслáвных, и пречи́стых, и животворя́щих Твои́х Тáин, не в тяжесть, ни в му́ку, ни в приложéние грехóв, но во очищéние, и освящéние, и обручéние бу́дущаго животá и Цáрствия, в стéну и пóмощь, и в возражéние сопроти́вных, во истреблéние мнóгих мои́х согрешéний. Ты бо еси́ Бог ми́лости, и щедрóт, и человеколю́бия, и Тебé слáву возсылáем со Отцéм и Святы́м Ду́хом, ны́не и при́сно и во вéки векóв. Ами́нь.

Молитва святого Василия Великого, 5-я

Вем, Гóсподи, я́ко недостóйне причащáюся пречи́стаго Твоегó Тéла и честны́я Твоея́ Крóве, и пови́нен есмь, и суд себé ям и пию́, не разсуждáя Тéла и Крóве Тебé Христá и Бóга моегó, но на щедрóты Твоя́ дерзáя прихожду́ к Тебé рéкшему: яды́й Мою́ плоть, и пия́й Мою́ кровь, во Мне пребывáет, и Аз в нем. Умилосéрдися у́бо, Гóсподи, и не обличи́ мя грéшнаго, но сотвори́ со мнóю по ми́лости Твоéй; и да бу́дут ми святáя сия́ во исцелéние, и очищéние, и просвещéние, и сохранéние, и спасéние, и во освящéние души́ и тéла; во отгнáние вся́каго мечтáния, и лукáваго дея́ния, и дéйства диáвольскаго, мы́сленне во удесéх мои́х дéйствуемаго, в дерзновéние и любóвь, я́же к Тебé; во исправлéние жития́ и утверждéние, в возращéние добродéтели и совершéнства; во исполнéние зáповедей, в Ду́ха Святáго общéние, в напу́тие животá вéчнаго, во отвéт благоприя́тен на Стрáшнем Суди́щи Твоéм: не в суд или́ во осуждéние.

Молитва святого Симеона Нового Богослова, 6-я

От сквéрных устéн, от мéрзкаго сéрдца, от нечи́стаго язы́ка, от души́ осквернéны, приими́ молéние, Христé мой, и не прéзри мои́х ни словéс, нижé образóв, нижé безсту́дия. Даждь ми дерзновéнно глагóлати, я́же хощу́, Христé мой, пáче же и научи́ мя, что ми подобáет твори́ти и глагóлати. Согреши́х пáче блудни́цы, я́же увéде, где обитáеши, ми́ро купи́вши, прии́де дéрзостне помáзати Твои́ нóзе, Бóга моегó, Влады́ки и Христá моегó. Я́коже óну не отри́нул еси́ пришéдшую от сéрдца, нижé менé возгнушáйся, Слóве: Твои́ же ми подáждь нóзе, и держáти и целовáти, и струя́ми слéзными, я́ко многоцéнным ми́ром, сия́ дéрзостно помáзати. Омы́й мя слезáми мои́ми, очи́сти мя и́ми, Слóве. Остáви и прегрешéния моя́, и прощéние ми подáждь. Вéси зол мнóжество, вéси и стру́пы моя́, и я́звы зри́ши моя́, но и вéру вéси, и произволéние зри́ши, и воздыхáние слы́шиши. Не таи́тся Тебé, Бóже мой, Твóрче мой, Избáвителю мой, нижé кáпля слéзная, нижé кáпли часть нéкая. Несодéланное моé ви́десте óчи Твои́, в кни́зе же Твоéй и ещé несодéянная напи́сана Тебé суть. Виждь смирéние моé, виждь труд мой ели́к, и грехи́ вся остáви ми, Бóже вся́ческих: да чи́стым сéрдцем, притрéпетною мы́слию, и душéю сокрушéнною, несквéрных Твои́х причащу́ся и пресвяты́х Тáин, и́миже оживля́ется и обожáется всяк яды́й же и пия́й чи́стым сéрдцем; Ты бо рекл еси́, Влады́ко мой: всяк яды́й Мою́ Плоть, и пия́й Мою́ Кровь, во Мне у́бо сей пребывáет, в нéмже и Аз есмь. И́стинно слóво вся́ко Влады́ки и Бóга моегó: Божéственных бо причащáяйся и боготворя́щих благодáтей, не у́бо есмь еди́н, но с Тобо́ю, Христé мой, Свéтом трисо́лнечным, просвещáющим мир. Да у́бо не еди́н пребу́ду кромé Тебé Живодáвца, дыхáния моегó, животá моегó, рáдования моегó, спасéния ми́ру. Сегó рáди к Тебé приступи́х, я́коже зри́ши, со слезáми, и душéю сокрушéнною, избавлéния мои́х прегрешéний прошу́ прия́ти ми, и Твои́х живодáтельных и непорóчных Тáинств причасти́тися неосуждéнно, да пребу́деши, я́коже рекл еси́, со мнóю треокая́нным: да не кромé обрéт мя Твоея́ благодáти, прелéстник восхи́тит мя льсти́вне, и прельсти́в отведéт боготворя́щих Твои́х словéс. Сегó рáди к Тебé припáдаю, и тéпле вопию́ Ти: я́коже блу́днаго прия́л еси́, и блудни́цу пришéдшую, тáко приими́ мя блу́днаго и сквéрнаго, Щéдре. Душéю сокрушéнною, ны́не бо к Тебé приходя́, вем, Спáсе, я́ко ины́й, я́коже аз, не прегреши́ Тебé, нижé содéя дея́ния, я́же аз содéях. Но сиé пáки вем, я́ко не вели́чество прегрешéний, ни грехóв мнóжество превосхóдит Бóга моегó мнóгое долготерпéние и человеколю́бие крáйнее; но ми́лостию сострáстия тéпле кáющияся, и чи́стиши, и свéтлиши, и свéта твори́ши причáстники, óбщники Божествá Твоегó содéловаяй незави́стно, и стрáнное и Áнгелом, и человéческим мы́слем, бесéдуеши им мнóгажды, я́коже другóм Твои́м и́стинным. Сия́ дéрзостна творя́т мя, сия́ вперя́ют мя, Христé мой. И дерзáя Твои́м богáтым к нам благодея́нием, рáдуяся вку́пе и трепещá, огнéви причащáюся травá сый, и стрáнно чу́до, орошáемь неопáльно, я́коже у́бо купинá дрéвле неопáльне горя́щи. Ны́не благодáрною мы́слию, благодáрным же сéрдцем, благодáрными удесы́ мои́ми, души́ и тéла моегó, покланя́юся и величáю, и славослóвлю Тя, Бóже мой, я́ко благословéнна су́ща, ны́не же и во вéки.

Молитва святого Иоанна Златоустого, 7-я

Бóже, ослáби, остáви, прости́ ми согрешéния моя́, ели́ка Ти согреши́х, áще слóвом, áще дéлом, áще помышлéнием, во́лею или́ нево́лею, рáзумом или́ неразу́мием, вся ми прости́ я́ко благ и Человеколю́бец, и моли́твами Пречи́стыя Твоея́ Мáтере, у́мных Твои́х служи́телей и святы́х сил, и всех святы́х, от вéка Тебé благоугоди́вших, неосуждéнно благоволи́ прия́ти ми святóе и пречи́стое Твоé Тéло и честну́ю Кровь, во исцелéние души́ же и тéла, и во очищéние лукáвых мои́х помышлéний. Я́ко Твоé есть Цáрство и си́ла и слáва, со Отцéм и Святы́м Ду́хом, ны́не и при́сно и во вéки векóв. Ами́нь.

Его же, 8-я

Несмь довóлен, Влады́ко Гóсподи, да вни́деши под кров души́ моея́; но понéже хóщеши Ты, я́ко Человеколю́бец, жи́ти во мне, дерзáя приступáю; повелевáеши, да отвéрзу двéри, я́же Ты еди́н создáл еси́, и вни́деши со человеколю́бием я́коже еси́, вни́деши и просвещáеши помрачéнный мой пóмысл. Вéрую, я́ко сиé сотвори́ши: не бо блудни́цу, со слезáми пришéдшую к Тебé, отгнáл еси́; нижé мытаря́ отвéргл еси́ покáявшася; нижé разбóйника, познáвша Цáрство Твоé, отгнáл еси́; нижé гони́теля покáявшася остáвил еси́, éже бе: но от покая́ния Тебé пришéдшия вся, в лицé Твои́х другóв вчини́л еси́, Еди́н сый благословéнный всегдá, ны́не и в безконéчныя вéки. Ами́нь.

Его же, 9-я

Гóсподи Иису́се Христé, Бóже мой, ослáби, остáви, очи́сти и прости́ ми грéшному, и непотрéбному, и недостóйному рабу́ Твоему́ прегрешéния, и согрешéния, и грехопадéния моя́, ели́ка Ти от ю́ности моея́, даже до настоя́щаго дне и чáса согреши́х: áще в рáзуме и в неразу́мии, áще в словесéх или дéлех, или́ помышлéниих и мы́слех, и начинáниих, и всех мои́х чу́вствах. И моли́твами безсéменно рóждшия Тя, Пречи́стыя и Приснодéвы Мари́и, Мáтере Твоея́, еди́ныя непосты́дныя надéжды и предстáтельства и спасéния моегó, сподóби мя неосуждéнно причасти́тися пречи́стых, безсмéртных, животворя́щих и стрáшных Твои́х Тáинств, во оставлéние грехóв и в жизнь вéчную: во освящéние, и просвещéние, крéпость, исцелéние, и здрáвие души́ же и тéла, и в потреблéние и всесовершéнное погублéние лукáвых мои́х пóмыслов, и помышлéний, и предприя́тий, и нощны́х мечтáний, тéмных и лукáвых духóв; я́ко Твоé есть Цáрство, и си́ла, и слáва, и честь, и поклонéние, со Отцéм и Святы́м Твои́м Ду́хом, ны́не и при́сно и во вéки векóв. Ами́нь.

Молитва святого Иоанна Дамаскина, 10-я

Пред двéрьми хрáма Твоегó предстою́, и лю́тых помышлéний не отступáю; но Ты, Христé Бóже, мытаря́ оправди́вый, и хананéю поми́ловавый, и разбóйнику рая́ двéри отвéрзый, отвéрзи ми утрóбы человеколю́бия Твоегó, и приими́ мя приходя́ща и прикасáющася Тебé, я́ко блудни́цу, и кровоточи́вую: óва у́бо крáя ри́зы Твоея́ косну́вшися, удобь исцелéние прия́т, óва же пречи́стеи Твои́ нóзе удержáвши, разрешéние грехóв понесé. Аз же, окая́нный, все Твоé Тéло дерзáя восприя́ти, да не опалéн бу́ду; но приими́ мя, я́коже óныя, и просвети́ моя́ душéвныя чу́вства, попаля́я моя́ грехóвныя вины́, моли́твами безсéменно Рóждшия Тя, и Небéсных Сил; я́ко Благословéн еси́ во вéки векóв. Ами́нь.

Молитва святого Иоанна Златоустого

Вéрую, Гóсподи, и исповéдую, я́ко Ты еси́ вои́стинну Христóс, Сын Бóга живáго, пришéдый в мир грéшныя спасти́, от ни́хже пéрвый есмь аз. Ещé вéрую, я́ко сиé есть сáмое пречи́стое Тéло Твоé, и сия́ есть сáмая честнáя Кровь Твоя́. Молю́ся у́бо Тебé: поми́луй мя, и прости́ ми прегрешéния моя́, вóльная и невóльная, я́же слóвом, я́же дéлом, я́же вéдением и невéдением, и сподóби мя неосуждéнно причасти́тися пречи́стых Твои́х Тáинств, во оставлéние грехóв, и в жизнь вéчную. Ами́нь.

Приходя же причаститься, произноси мысленно эти стихи Метафраста:

Се приступáю к Божéственному Причащéнию.

Содéтелю, да не опали́ши мя приобщéнием:

Огнь бо еси́, недостóйныя попаля́яй.

Но у́бо очи́сти мя от вся́кия сквéрны.

Затем:

Вéчери Твоея́ тáйныя днесь, Сы́не Бóжий, причáстника мя приими́; не бо врагóм Твои́м тáйну повéм, ни лобзáния Ти дам, я́ко Иу́да, но я́ко разбóйник исповéдаю Тя: помяни́ мя, Гóсподи, во Цáрствии Твоéм.

И стихи:

Боготворя́щую Кровь ужасни́ся, человéче, зря:

Огнь бо есть, недостóйныя попаля́яй.

Божéственное Тéло и обожáет мя и питáет:

Обожáет дух, ум же питáет стрáнно.

Потом тропари:

Услади́л мя еси́ любóвию, Христé, и измени́л мя еси́ Божéственным Твои́м рачéнием; но попали́ огнéм невещéственным грехи́ моя́, и насы́титися éже в Тебé наслаждéния сподóби: да лику́я возвеличáю, Блáже, два пришéствия Твоя́.

Во свéтлостех святы́х Твои́х кáко вни́ду, недостóйный? Áще бо дерзну́ совни́ти в чертóг, одéжда мя обличáет, я́ко нéсть брáчна, и свя́зан извéржен бу́ду от Áнгелов. Очи́сти, Гóсподи, сквéрну души́ моея́, и спаси́ мя, я́ко Человеколю́бец.

Также молитву:

Влады́ко Человеколю́бче, Гóсподи Иису́се Христé Бóже мой, да не в суд ми бу́дут Святáя сия́, за éже недостóйну ми бы́ти: но во очищéние и освящéние души́ же и тéла, и во обручéние бу́дущия жи́зни и Цáрствия. Мне же, éже прилепля́тися Бóгу, блáго есть, полагáти во Гóсподе уповáние спасéния моегó.

И еще:

Вéчери Твоея́ тáйныя днесь, Сы́не Бóжий, причáстника мя приими́ не бо врагóм Твои́м тáйну повéм, ни лобзáния Ти дам, я́ко Иу́да, но я́ко разбóйник исповéдаю Тя: помяни́ мя, Гóсподи, во Цáрствии Твоéм.

***

Желающий причаститься должен достойно приготовиться к этому святому Таинству. Приготовление это (в церковной практике оно называется говением) продолжается несколько дней и касается как телесной, так и духовной жизни человека. Телу предписывается воздержание, т.е. телесная чистота и ограничение в пище (пост). В дни поста исключается пища животного происхождения — мясо, молоко, яйца и, при строгом посте, рыба. Хлеб, овощи, фрукты употребляются в умеренном количестве. Ум не должен рассеиваться по мелочам житейским и развлекаться.

В дни говения надлежит посещать богослужение в храме, если позволяют обстоятельства, и более прилежно выполнять домашнее молитвенное правило: кто обычно читает не все утренние и вечерние молитвы, пусть прочитает все полностью, кто не читает каноны, пусть читает в эти дни хотя бы по одному канону. Накануне причащения надо быть на вечернем богослужении и прочитать дома, кроме обычных молитв на сон грядущим, канон покаянный, канон Богородице и Ангелу Хранителю. Каноны читают или один за другим полностью, или соединяя таким образом: читается ирмос первой песни покаянного канона («Яко по суху») и тропари, затем тропари первой песни канона Богородице («Многими содержимь»), опуская ирмос «Воду прошед», и тропари канона Ангелу Хранителю, тоже без ирмоса «Поим Господеви». Так же читают и следующие песни. Тропари перед каноном Богородице и Ангелу Хранителю, а также стихиры после канона Богородице в таком случае опускаются.

Читается также канон ко причащению и, кто пожелает, — акафист Иисусу Сладчайшему. После полуночи уже не едят и не пьют, ибо принято приступать к Таинству Причащения натощак. Утром прочитываются утренние молитвы и все последование ко Святому Причащению, кроме канона, прочитанного накануне.

Перед причащением необходима исповедь — вечером или утром, перед литургией.